Эпідэміёлаг распавёў пра каранцін, маскі і пік эпідэміі каронавірусу ў Беларусі
Сітуацыя з каронавірусам у Беларусі развіваецца імкліва. У пятніцу было плюс 400 хворых, у суботу – плюс 245. Ужо больш за 2 тысячы людзей у краіне маюць пацверджаную каронавірусную інфекцыю.
Каментар для нас, на ўмовах ананімнасці, пагадзіўся даць лекар-эпідэміёлаг адной больніц Гарадзенскай вобласці.
– На ваш погляд, ці трэба даваць магчымасць праверыцца на каронавірус усім жадаючым, ці мэтазгодна гэта?
– У звычайнай сітуацыі жаданне ведаць стан свайго здароўя можна толькі вітаць, але ў нашай сітуацыі мы не можам пратэставаць кожнага жадаючага – прынамсі, пакуль што. Усе аналізы на каронавірус адпраўляюцца ў абласны цэнтр: працэдура не самая хуткая і танная атрымліваецца.
– Якія меры можна было б увесці ў Беларусі, каб мінімізаваць колькасць хворых і пры гэтым не нанесці вялікай шкоды эканоміцы?
– Ведаеце, я не эканаміст і я не магу казаць пра наступствы для эканомікі. Агучу выключна сваё меркаванне. Напэўна, было б добра ўвесці каранцін хоць бы ў навучальных установах. Шчыра кажучы, я не разумею чаму гэта яшчэ не зроблена паўнавартасна. Думаю, гэта пытанне часу.
– Ці трэба ўсім насіць маскі?
– Маскі абавязковыя для медыкаў, для звычайных грамадзянаў – не ўпэўнены. Маску трэба ўмець насіць правільна, бо часта яна стварае эфект памылковай бяспекі, чалавек менш кантралюе свае дзеянні.
Самае важнае – гэта выконваць базавыя патрабаванні: трымаць дыстанцыю і мыць рукі.
– На вашу думку, як будзе развівацца сітуацыя з каронавірусам у Беларусі?
– Складана судзіць, не валодаючы поўнай інфармацыяй з іншых рэгіёнаў. Адно можна сказаць дакладна: калі нічога не мяняць у нашай стратэгіі па стрымліванні эпідэміі, уся сістэма Міністэрства аховы здароўя будзе працаваць толькі на хворых каронавірусам. Я сумняюся, ці атрымаецца нам утрымаць сітуацыю пад кантролем. Трэба ўносіць змены, гэта дакладна.
– Калі ў Беларусі магчымы пік эпідэміі?
– Усё залежыць ад мер якія будзе прадпрымаць Міністэрства аховы здароўя. Рабіць цяпер прагнозы – гэта варажба на кававай гушчы.
