Былая дэпутатка Палаты прадстаўнікоў Беларусі Ганна Канапацкая заявіла, што мае намер стаць адзіным кандыдатам ад апазіцыі на прэзідэнцкіх выбарах. Ганна Канапацкая прыме ўдзел у праймарыз, пра што яна напісала ў сваім Facebook.
«Я прыняла рашэнне – іду на праймарыз. Прапаноўваю вам азнаёміцца з «Асноўнымі тэзісамі праграмы ўдзельніка праймарыз па вылучэнні адзінага кандыдата на прэзідэнта Рэспублікі Беларусь Ганны Канапацкай», – адзначыла Ганна Канапацкая.
27 студзеня шэраг апазіцыйных структураў (Рух «За Свабоду», АГП, БСДП, партый БХД і БНФ) правялі супольную прэс-канферэнцыю, падчас якой абвясцілі пра пачатак працэдуры абрання адзінага кандыдата ў прэзідэнты.
Агульны кандыдат будзе абраны паводле чатырох складнікаў: галасавання падчас паездак у рэгіёнах (30 балаў), галасавання ў інтэрнэце (30 балаў), галасавання на выніковым Кангрэсе дэмсілаў (30 балаў). Яшчэ 10 балаў падтрымання размяркуюць паміж удзельнікамі структуры, якія арганізоўваюць працэдуру.
Прыняць удзел у праймарыз можна як ад рэспубліканскай арганізацыі, так і прадставіўшы наяўнасць каманды з 200 актывістаў. Кожны з удзельнікаў робіць унёсак у эквіваленце 500 еўраў для арганізацыі праймарыз. Сродкі пойдуць на паездкі па рэгіёнах, арганізацыю Кангрэсу дэмакратычных сіл і стварэнне платформы для галасавання.
Тэрмін падачы заявак на праймарыз завяршаецца 16 лютага.
Прэзідэнцкія выбары павінны адбыцца ў 2020 годзе, не пазней за жнівень.
СК belsat.eu