Па выніках 2019 году ў Берасцейскай вобласці чакаюць каля 1 мільёну турыстаў (з улікам унутранага турызму), што на 20% больш за папярэдні год.
Паколькі ў гэтым рэгіёне сфера турызму развіваецца дынамічна, улады вырашылі зладзіць у красавіку ў Берасці турыстычны форум падчас V Міжнароднага форуму-выставы дзелавых кантактаў, паведамляе БелТА.
У Берасцейскім аблвыканкаме ўжо прыступілі да распрацоўкі праграмы мерапрыемстваў: па просьбах замежных партнёраў ім будзе прадстаўленая пляцоўка для кантактаў з прадстаўнікамі беларускага турбізнесу.
Для ўдзельнікаў форуму плануецца правесці прэзентацыі турыстычнай прывабнасці гарадоў і раёнаў Берасцейскай вобласці, арганізаваць серыю воркшопаў, перамоваў. На мерапрыемства запросяць прадстаўнікоў рэгіянальных адміністрацый, замежных турыстычных фірмаў, у першую чаргу з Польшчы, Літвы, Расеі.
Сёлета рэгіён наведалі каля 35 тысяч бязвізавых вандроўнікаў – гэта ўдвая больш за аналагічны перыяд мінулага году.
КА belsat.eu
