Чарговыя два будынкі з гарадзенскага «скансэну», вядомага як Новы свет, маюць пайсці пад знос, калі знойдзецца інвестар ды выкупіць зямлю ў цэнтры горада, на якой яны стаяць. Згодна аб’яве на сайце гарвыканкама аўкцыён мае прайсці 28 траўня.
Краязнаўцы і гісторыкі з гораду над Нёмнам у чарговы раз б’юць у званы: дамы па вуліцы Міцкевіча 7 і 9, у самым сэрцы Новага Свету, могуць пайсці пад знос ужо сёлета. Драўляныя будынкі ўжо адселеныя, пры гэтым, не маюць ахоўнага статусу – афіцыйна не з’яўляюцца гісторыка-культурнымі каштоўнасцямі, таму паводле закону гэта ўсяго толькі «ветхія пабудовы».
Разам з тым, абодва дома, збудаваныя на пачатку ХХ ст., маюць шмат унікальнага разнога дэкору з мадэрнымі ды эклектычнымі элементамі, а да ўсяго іншага фармуюць кампазіцыю маляўнічай вуліцы Міцкевіча. Адзін з будынкаў праз выразаныя фігуркі нават атрымаў сярод гарадзенцаў імя: «Дом з цмокамі».
«Можа, старшыня гарвыканкаму і не ведае…»
На гэтай жа вуліцы, зусім побач, жыве блогер і краязнаўца Руслан Кулевіч, аўтар кнігі «Горад адзін, успаміны розныя», прысвечаную ўспамінам старажылаў пра Горадню 1930-40-х гадоў.
«Сюды я перасяліўся, каб давесці, што ў гэтых дамах можна жыць, – тлумачыць Кулевіч, – Было б жаданне. У Літве ў падобных будыначках робяць музеі, крамкі з сувенірамі, офісы – выкарыстаць можна заўжды. Гэта наша гісторыя! Падобных дамоў у горадзе засталося не так і шмат, таму трэба за іх змагацца, рабіць нешта. Тым больш, старшыня гарвыканкаму Мечыслаў Гой абяцаў нам захаваць дамы… Можа ён нават і не ведае пра выстаўленне дамоў на аўкцыён. Хай бы прыслухаўся да народу – гэта вельмі важна!»
Гістарычныя будынкі адселеныя, таму знайсці нават іх былых жыхароў нам не ўдалося. Уладальнікі кватэраў у падобных дамках побач глядзяць на справу скептычна, маўляў, досыць ужо тут хадзіла-перахадзіла журналістаў ды гісторыкаў з фотаапаратамі – нічога з гэтага не будзе. Калі ўлады вырашылі зносіць, то будуць зносіць.
«Нельга дапусціць! Трэба пісаць уладам»
Вяртаючыся да старшыні гарвыканкама Мечыслава Гоя, варта адзначыць, што чыноўнік паабяцаў «даць дамкам другі шанец» падчас асабістай размовы з гісторыкам Мечыславам Супронам і Русланам Кулевічам, якія былі ў яго на прыёме на пачатку красавіка.
«У пагоні за кароткатэрміновымі выгодамі мы губляем цэлы шэраг момантаў, – адзначае Супрон, – Гэта і турыстычны патэнцыял цэлага кварталу, і наша спадчына, якую мы маем пакінуць нашчадкам, і твар гораду, які не варта прадаваць каму-кольвек. Гэтага нельга дапусціць! Трэба пісаць уладам».
Абяцанні-абяцаннямі, але аўкцыён ужо прызначаны на канец траўня: на месцы будынкаў па ўмовах мае з’явіцца 2-3-павярховая пабудова грамадскага прызначэння (гатэль альбо офісны цэнтр). Таргі пачнуцца з сумы ў 24,3 тысячы рублёў. Пры гэтым, толькі на знос дабротна-збудаваных дамкоў, паводле спецыялістаў гарвыканкаму пойдзе каля… 467 тысячы рублёў.
АК, фота Васіль Малчанаў belsat.eu
