Лукашэнка ўпэўнена апярэдзіў сусветных лідараў – Ангелу Мэркель, Дональда Трампа, Эмануэля Макрона і іншых. Па статыстыцы аналітычнага цэнтру «Новая Еўропа», большасць апытаных украінцаў назвалі менавіта кіраўніка Беларусі лепшым прыкладам для будучага прэзідэнта Украіны.
Каментуе Яўген Магда, дырэктар Цэнтру міжнароднай палітыкі:
«Ёсць вядомы анекдот – ня трэба блытаць турызм з эміграцыяй. Украінцы бачаць у Беларусі тое, што яны хочуць бачыць: добрыя дарогі, вычышчаныя, нават вылізаныя гарады, адсутнасць бамжоў. Давайце таксама не забываць, што ва Украіне мільёны людзей большую частку свайго жыцця пражылі ў Савецкім саюзе. І тут яны бачаць праз дарогу гэткі Савецкі саюз-лайт. І разумеюць, што ён звязаны з Лукашэнкам».
І сапраўды – парадак, стабільнасць і трывалая ўлада фігуруюць сярод асноўных украінскіх асацыяцый з Беларуссю. Хоць і падыходы Аляксандра Лукашэнкі да дзяржаўнага кіравання ўспрымаюцца не заўсёды ў пазітыўным ключы.
Жыхары Вінніцы:
«Я лічу яго не зусім дэмакратычным».
«Мне падабаецца той парадак, тая бяспека і стабільнасць, якая існуе ў сталіцы Беларусі і ў яе ваколіцах».
«Мне больш падабаюцца вясёлыя, сімпатычныя, людзі, што смяюцца. Як Уладзімір Зяленскі».
«Ён справядліва за людзьмі, Лукашэнка!»
«Калі б у нас такі «бацька» быў, гэта выдатна было б».
Яшчэ адзін важны фактар папулярнасці кіраўніка Беларусі: па статыстыцы, сярод трох галоўных чаканняў ад прэзідэнта Украіны – барацьба з карупцыяй і масавыя пасадкі вінаватых у ёй чыноўнікаў. Тое, што гэта не ўваходзіць у паўнамоцтвы кіраўніка дзяржавы для траціны ўкраінцаў – справа дзясятая.
«Менавіта фактар карупцыі грае ва Украіне значную ролю. А ў Беларусі, хоць карупцыі ня менш, чым ва Украіне, усё ж фактар гэтай паказушнай барацьбы з карупцыяй мае вялікі «пазітыўны» уплыў на ўспрыманне людзьмі. Таму з боку можа здавацца, што з карупцыяй у Беларусі ўсё строга», – упэўнены Рыгор Кастусёў, старшыня «Партыі БНФ».
Беларускія дзяржаўныя СМІ пасля хвалі абмеркавання гэтай прамовы Лукашэнкі ў інтэрнэце паспяшаліся выдаліць яе са сваіх старонак. А дарма – менавіта падобнага роду паводзіны, імгненныя адстаўкі чыноўнікаў у прамым эфіры і загады аб узбуджэнні крымінальных спраў – рэчы, якія, па словах экспертаў, сур’ёзна павышаюць рэйтынг Лукашэнкі ва Украіне і Расеі. Мала каго цікавіць далейшы лёс арыштаваных карупцыянераў ці чыноўнікаў пасля адстаўкі, хоць тыя часта проста атрымліваюць новыя пасады. Добрае звычайна запамінаецца лепш. І гэта ўласціва не толькі ўнутранай палітыцы.
«Якія-небудзь крокі Лукашэнкі ці беларускіх уладаў насустрач Расеі нават у сурʼёзнай аналітыцы і масавай свядомасці могуць ацэньвацца максімум як расчараванне, маўляў, шкада, што зараз так. Але любы мэсідж Лукашэнкі пра тое, што ён падтрымлівае Украіну, будзе паўтарацца і тыражавацца вельмі шырока», – перакананая Алена Тараненка, загадчыца кафедры журналістыкі Данецкага нацыянальнага ўніверсітэту імя Васіля Стуса.
Ужо што-што, а правільную рыторыку ў патрэбны момант кіраўнік Беларусі падбіраць ўмеў заўсёды.
Яшчэ адно папулярнае патрабаванне ўкраінцаў да кіраўніка сваёй дзяржавы – стабілізацыя вонкавай палітыкі, перамовы па Данбасу і Крыме з ЕЗ і ЗША. А перамоваў з Расеяй жадае больш за 20% жыхароў Украіны. На фоне вайны ў краіне і страты часткі тэрыторый, імідж Беларусі і яе кіраўніка (які, на думку шмат каго, паспяхова балансуе паміж Захадам і Расеяй) сапраўды можа здавацца прывабным украінцам, стомленым ад пяці гадоў вайны.
«Падобна, што гэта пошук такога абаронцы нацыянальных інтарэсаў. Гэта значыць, той самы вобраз «бацькі». Украінцам, асабліва ў час вайны і ў сітуацыі такой перадвыбарнай ліхаманкі, вельмі патрэбны «бацька», да якога можна прыціснуцца. І мне здаецца, што сярод украінскіх прэзідэнтаў не было таго, хто адыгрываў бы такі вобраз», – заключае Алена Тараненка.
Абсалютна такога ж вобразу сапраўды няма, аднак ужо ў нядзелю ўкраінцы могуць выбраць ледзь не свайго ўласнага Лукашэнку – шматлікія эксперты параўноўваюць сітуацыю ў Украіне цяпер з выбарамі ў Беларусі ў 1994 годзе. Чалавек старой сістэмы супраць маладога-перспектыўнага, які карыстаецца падтрымкай «простага народа», шчодра раздае абяцанні і прапануе простыя адказы на складаныя пытанні.
Дзмітрый Міцкевіч/МВ, «Белсат»
Сюжэт паказалі ў праграме «Прасвет» 19.04.2019
