7 сакавіка Віцебск стаў другім горадам у Беларусі, дзе прайшла рэгіянальная сустрэча па вылучэнні адзінага кандыдата ў прэзідэнты ад аб’яднанай апазіцыі.
Удзел у галасаванні пасля выступу ўдзельнікаў праймерыз узяў 101 чалавек. З іх 66, або больш за 65 %, прагаласавалі ў падтрыманне сустаршыні аргкамітэту партыі «Беларуская хрысціянская дэмакратыя» Паўла Севярынца, паведамілі ў БХД.
Старшыня Аб’яднанай грамадзянскай партыі Мікалай Казлоў і старшыня «Руху за свабоду» Юрась Губарэвіч набралі па 15 галасоў. За намесніка старшыні Партыі БНФ Аляксея Янукевіча прагаласавалі 4 чалавекі, за самавылучэнку, сустаршыню БХД Вольгу Кавалькову галасоў не аддаў ніхто.
Адзін бюлетэнь быў прызнаны несапраўдным.
За два дні ў Паўла Севярынца 69 галасоў, Юрася Губарэвіча – 19, Мікалая Казлова – 15, Аляксея Янукевіча – 5. У Вольгі Кавальковай галасоў няма.
Таксама 7 сакавіка праймерыз пройдуць у Наваполацку, а 8 сакавіка – у Паставах, Шаркаўшчыне і Мёрах.
МГ belsat.eu