БНТУ пераводзяць на індывідуальнае навучанне. У студэнта гэтай ВНУ выявілі каронавірус. ВІДЭА
Каронавірус у Беларусі выяўлены ў грамадзяніна Ірану, які навучаецца ў БНТУ. 27 лютага ў студэнта афіцыйна пацвердзілі інфекцыю, паведаміў міністр аховы здароўя Уладзімір Каранік, піша БелТА.
Студэнт з Ірану, а таксама і асобы, з якімі ён камунікаваў, змешчаныя ў закрытыя боксы Менскага інфекцыйнага шпіталю.
БНТУ, дзе навучаецца студэнт з Ірану, пераводзіцца на індывідуальнае навучанне.
«ВНУ, у якім выявілі выпадак інфікавання на каронавірус, пераводзіцца на індывідуальную праграму навучання. Гэта БНТУ», – сказаў міністр аховы здароўя Уладзімір Каранік.
Міністр распавёў, што грамадзяніна Ірану выклікалі на абследаванне ў 33-ю паліклініку Менску. На момант агляду скаргаў на стан здароўя ў яго не было.
«Але медыкаў збянтэжыла невялікая тэмпература, 37,3 градусаў, чырвонае горла. Ён быў дастаўлены ў інфекцыйны шпіталь, дзе былі ўзятыя мазкі і пацверджана наяўнасць каронавірусу. Цяпер мы ўдакладняем, наколькі гэта эпідэміялагічны штам», – праінфармаваў Уладзімір Каранік.
Міністр таксама ўдакладніў, што са студэнтамі, з якімі ён вучыўся і пражываў, цяпер вядуцца супрацьэпідэміялагічныя захады. Яны пераведзеныя пад медычнае назіранне.
Цягам бліжэйшых двух тыдняў заняткаў у аўдыторыях не будзе, паведамляе прэсавая служба БНТУ.
Што рабіць, каб не падхапіць заразу?
- Абавязкова трэба мыць рукі з мылам. Чым часцей, тым лепш! Але рабіце гэта правільна. Тут інструкцыя.
- Не дакранайцеся да рота і твару нямытымі рукамі.
- Узмацняйце імунітэт.
- Лепш не цалавацца і не паціскаць рукі.
- Пазбягайце кантактаў з хворымі.
- Калі ёсць магчымасць, то насіце маску. Мяняйце яе раз на дзве гадзіны.
- Карыстайцеся дэзынфектарамі на спіртавой аснове.
- Праветрывайце памяшканні, у якіх вы жывяце і працуеце.
- Тлумачце дзецям, чаму варта мыць рукі!
СК belsat.eu
