Блогера Сяргея Пятрухіна хочуць прыцягнуць да адказнасці па крымінальнай справе

Берасцейскі міжраённы аддзел Следчага камітэта Рэспублікі Беларусь 1 лютага вынес пастанову аб прыцягненні берасцейскага блогера Сяргея Пятрухіна у якасці абвінавачанага па крымінальнай справе, якая была распачата ў дачыненні да яго раней па артыкулах паклёп і абраза.

Пра гэта «Брэсцкай газеце» паведаміў Сяргей Пятрухін.

Падставай для прыцягнення блогера да крымінальнай адказнасці па артыкуле «Паклёп» стаў відэаролік, які быў зняты яшчэ ў сакавіку летась у будынку суда Ленінскага раёну Берасця і трансляваўся на відэахостынгу YouTube. У ім Пятрухін, як гаворыцца ў пастанове, выказваў інфармацыю ў дачыненні да ўчастковага інспектара Ленінскага РАУС Сяргея Ігнацюка.

А ў красавіка 2018 году на сваёй старонцы ў сацсетцы «Вконтакте» ён размясціў каментар, «які змяшчае пагардлівыя, прыніжальныя, негатыўна-ацэначныя, не адпаведныя нормам выразы да відэасюжэту «Цудоўная четверка_3. Насаты. Фінал». Тым самым ён «наўмысна зняважыў гонар і годнасць» чацвярых супрацоўнікаў Ленінскага РАУС, чым нанёс ім маральную шкоду ці здзейсніў злачынства, прадугледжанае ў артыкуле «Абраза».

Берасцейскі блогер Cяргей Пятрухін – сталы і нязменны ўдзельнік акцыяў пратэсту супраць шкоднага акумулятарнага заводу. Блогер праводзіць уласныя расследаванні, раскрываючы факты карупцыі і крадзяжу.

Блогеру Пятрухіну спрабавалі ўручыць позву. Як гэта адбывалася?

СК, belsat.eu

Hавiны