Інфармацыйна-аналітычны цэнтр пры Адміністрацыі прэзідэнта Беларусі апублікаваў працу «Рэспубліка Беларусь у люстэрку сацыялогіі» – зборнік з вынікамі сацыялагічных даследаванняў, праведзеных у 2017-ым і 2018 гадах.
У 2017 годзе 39,9 % апытаных заявілі, што часцей з усё атрымліваюць інфармацыю ў сацсетках (37,3 % на сайтах з навінамі). З даследавання вынікае, што самы папулярны канал распаўсюду інфармацыі ў Беларусі – сацыяльная сетка «Одноклассники».
48 % апытаных лічаць роднаю беларускую мову. Расейскую роднай называюць 43 %. Даследаванне моўнага пытання праводзілася ў 2017 годзе.
Большасць апытаных беларусаў давярае расейскаму і дзяржаўнаму тэлебачанню. 39,7 % апытаных сказалі, што давяраюць нашаму тэлеканалу. З апытання ІАЦ вынікае, што «Белсату» не давяраюць 46 %.
Паводле сацыялагічнага даследавання «Civitta Group Satio», 80,2 % беларусаў давяраюць «Белсату».
У 2017-ым 19 % былі гатовыя выйсці на пратэст. Прычым 2 % былі гатовыя ўзяць удзел ва ўзброеным супраціве. У 2018-ым лік патэнцыйных пратэстоўцаў знізіўся да 9 %. Летась 66 % маладых беларусаў не бачылі сэнсу браць удзел у мітынгах. Іншага меркавання прытрымліваліся 30,5 % беларускай моладзі.
Доля беларусаў, якія падтрымліваюць смяротнае пакаранне, вырасла з 52 % у 2016 годзе да 60 % у 2017-ым.
Беларусы наракаюць на высокія кошты ва ўсіх сферах: ад коштаў на лекі да коштаў на жыллёва-камунальныя паслугі, кошты на жыллё, праезд у грамадскім транспарце.
ЮВ, belsat.eu