Беларускія дзеці хочуць быць беларусамі – але дарослыя ім не даюць. Правакацыйны сюжэт новай дзіцячай казкі пра літару Ў

«Як літара Ў Ярылу-Сонца ў Вырай выпраўляла» – новы тэатральны праект кампазітара, сцэнарыста і прадусара Рамана Арлова, вядомага па мюзікле «Чарадзей», а таксама двух папярэдніх частках сагі пра прыгоды літары «Ў» – «Як літара Ў уратавала Каляды» і «Як літара Ў вясну гукала».

«Нечакана мы зразумелі, што такога праекту папросту няма на рынку. І таму, пераадольваючы цяжкасці – адсутнасць фінансавання, негатыўныя водгукі крытыкаў ды іншыя – проста пачалі рабіць. І вось – ужо восем паказаў адбылося. Час рушыць далей і зрабіць паўнавартасную серыю – па адной казцы да кожнага сонцавароту» – распавядае аўтар праекту Раман Арлоў, які піша да цыклу казак музыку, тэксты і лібрэта.

Рэжысёрам ды выканаўцай галоўнай ролі выступае Кацярына Поцюс. У файе, як і на пяпярэдніх казках, гледачы пабачаць аутэнтычныя народныя песні і танцы ад школы традыцыйнага мастацтва Вікторыі Міхна.

Пра што ж новая казка?

Пра тое, што здарылася з літарай Ў і яе сябрамі ўлетку і ўвосень.

Пасля таго, як злы чараўнік Зюзя быў пераможаны (сюжэт вясновай казкі «Як літара Ў вясну гукала») урэшце надышла Вясна, а потым і Лета. Ярыла-Сонца саграваў зямлю, прырода і людзі песціліся ў цяпле і радасці.

Але разбэсціліся людзі, перасталі Ярылу паважаць, сталі ўдаваць, нібы Ярыла цяпер назаўсёды з імі, і нібы нават на службе ў іх.

Сталі нават казаць, што непатрэбен Ярыла, ды і навогул духі беларускай зямлі непатрэбныя, ды і сама Беларусь, з яе культурай, мовай і старадаўнімі звычаямі непатрэбная, а сонца і так свеціць і свяціць надалей будзе. Спрабавала Літара «Ў» утрымаць людзей ад такой дурасці – але не паслухалі яе людзі. Больш за тое – сказалі, што Літары такой не ведаюць і ведаць не хочуць. Толькі беларускія дзеці ўсё зразумелі – але што ж яны, малыя, могуць зрабіць супраць дурасці дарослых?

Аслабеў Ярыла ад такой хцівасці і дурасці людской. Разумная літара «Ў» вырашыла – каб не звёўся канчаткова Ярыла, трэба ратаваць яго. І выправіла Літара «Ў» Ярылу-Сонца ў Светлы Вырай, каб там ён вярнуў сваю сілу. А можа да гэтага часу людзі і адумаюцца…

Паказы двух папярэдніх казак пра прыгоды Літары Ў і яе сяброў – «Як літара Ў уратавала Каляды» і «Як літара Ў вясну гукала» з поспехам прайшлі ў Менску, а таксама ў іншых гарадах Беларусі – Ашмянах, Гальшанах, Астраўцы.

Спектакль адбудзецца 22 верасня, у суботу, а 16-00 у Моладзевым Театры Эстрады.

Усім дзецям – салодкі пачастунак!

Інфалінія: +375 29 8517706, +375 44 7777846

Квіткі ад 6,5р. да 17р. Набыць іх можна тут, тут і вось тут.

Hавiны