Беларусь разглядае магчымасць скіраваць свой вайсковы міратворчы кантынгент у Ліван. Пра гэта паведамляе «Наша Ніва».
Пытанне накіравання беларускіх міратворцаў абмяркоўвалася падчас візіту на мінулым тыдні ў Беларусь начальніка Генеральнага штаба Італіі Энца Вэч’ярэлі, паведаміў начальнік беларускага Генштабу, дэпутат Алег Белаконеў.
На сёння ў Ліване ўжо ёсць беларусы ў структурах забеспячэння і ў медычным персанале. Нясуць там службу і два аператыўныя афіцэры з Беларусі.
«Мы абмяркоўвалі са спадаром Вэч’ярэлі тэхнічныя пытанні, якія трэба ўнесці ў дакументы, каб і наш вайсковы кантынгент змог паехаць у складзе італьянскіх сіл у Ліване і выконваць сумесныя задачы з сербамі, італьянцамі і палякамі», – расказаў Белаконеў.
Менавіта Італія з’яўляецца кіраўніком кантынгенту ААН у Ліване.
Паводле Белаконева, Беларусь таксама гатовая да сумесных вучэнняў з NATO, абмяркоўваюцца магчымыя фарматы. Але пры гэтым у NATO павінны разумець, што стратэгічным хаўруснікам Менску з’яўляецца Масква, дадаў ён.
МГ belsat.eu