Кампанія NT Marine, блізкая да беларускага бізнесоўца Мікалая Варабʼя, атрымала квоты на пастаўку больш за 600 000 тонаў расейскага вугалю ва Украіну. Раней вугаль з Расеі прадавалі самі вытворцы, атрымліваючы дазволу ў Мінэканамразвіцця. Пра гэта піша РБК.
Кампанія NT Marine, зарэгістраваная ў Эстоніі, атрымала дазвол на пастаўку больш за 600 000 тонаў вугалю з Расеі на Украіну (крыху менш за 50% усіх паставак) у снежні 2019 года. Квоты на папярэдні месяц былі размеркаваны выключна паміж расейскімі вытворцамі.
Паводле эстонскага рэестра, уладальнікам NT Marine зʼяўляецца Аляксей Чулец, які разам з расейскім партнёрам валодаў Паўночным портам Палдыскі ў Эстоніі. Таксама ў NT Marine ёсць расейская «дачка» «Юларус», якая займаецца гандлем паліва.
NT Marine займаецца перавозкай нафты і вугалю на Украіну і ўваходзіць у сферу інтарэсаў беларускага алігарха Мікалая Варабʼя, паведамляюць крыніцы РБК.
«Расейская чыгунка выконвае заяўкі на перавозку вугалю ў асноўным толькі гэтай кампаніі – NT Marine AS. Яна звязаная з інтарэсамі Мікалая Варабʼя, беларускага алігарха», – заявіў кіраўнік украінскага Незалежнага саюзу гарнякоў Міхаіл Валынец, па дадзеных якога Варабей падтрымлівае стасункі з украінскім палітыкам Віктарам Медведчуком.
Паводле спісу квотаў на лістапад і снежань, Расея пастаўляе на прадпрыемствы Украіны 1,2-1,3 млн т вугалю і коксу ў месяц. Пры бягучых цэнах на вугаль ($ 85-100 за т) выручка NT Marine у выпадку паставак расейскага вугалю на працягу года можа скласці $ 50 млн.
- Мікалай Варабей займае 16-е месца ў рэйтынгу самых паспяховых і ўплывовых бізнесоўцаў, што рэгулярна складае выданне «Ежедневник». Ён нарадзіўся на тэрыторыі Украіны, скончыў Кіеўскі нацыянальны ўніверсітэт, у Беларусі жыве з канца 80-х. Ягоны бізнес – гэта продаж нафтапрадуктаў, лагістыка, банкаўская справа, нерухомасць, імпарт аўтамабіляў. Саўладальнік лагістычнага цэнтру «Брэміна груп», валодае «Абсалютбанкам» і Нафтабітумным заводам.
- У 2018 годзе Беларусь нечакана стала адным з найбуйнейшых экспарцёраў вугалю ў Еўропу і Украіну. Годам раней абʼем экспарту вугалю ва Украіну быў у 980 разоў меншы. Журналісты і эксперты ўпэўненыя, што беларускія кампаніі набываюць у Расеі вугаль вывезены з Данбасу. З украінскай мытнай статыстыкі за 2018 год вынікае, што пастаўкамі вугалю ва Украіну займаліся 4 зарэгістраваныя ў Беларусі кампаніі: гомельскія ТАА «Бизнес-Альянс» (80,26 тысяч тонаў) і ТАА «Транс-Уголь» (46,29 тысяч тонаў), ТАА «Экойл Кемикл» (27,07 тысяч тонаў) з Полацкага раёну ды ТАА «ЭколайнСистемс» (20,11 тысяч тонаў) з Менску.
ІІ belsat.eu
