Аляксандр Куль узгадвае, што ў ягонай роднай вёсцы большасць ужывала трасянку. Але гэта не перашкодзіла яму навучыцца размаўляць на чыстай беларускай мове.
Ён гуляў за нацыянальную зборную Беларусі па баскетболе ў складзе маладзёвай зборнай. Пасля скончыў амерыканскі ўніверсітэт і прафесійна гуляў у баскетбол у Еўропе. І веданне беларускай мовы ніяк не зашкодзіла міжнароднай кар’еры.
Увесь гэты досвед прыдаўся, калі Аляксандр Куль стаў маркетынгавым дырэктарам у баскетбольным клубе «Цмокі-Менск». «Мне было прыемна, што я маю магчымасць прывабіць беларускамоўную аўдыторыю да баскетболу, а спартовую – да беларускай мовы і культуры», – узгадвае ён.
Аляксандра Куля цешыць, што ўсё болей моладзі камунікуе міжсобку па-беларуску.
«Без мовы няма культуры, а культура – гэта аснова нацыі», – тлумачыць ён і заклікае падчас сёлетняга перапісу насельніцтва ў пытанні № 12 пазначыць беларускую мову роднай.
Прыхільнікаў беларускай мовы непакоіць, што вынікі гэтага перапісу будуць яшчэ больш сумнымі, чым папярэдняга. Тады, у 2009 годзе, роднай беларускую мову назвалі ўсяго 53,2 % насельніцтва. На 20 % менш, чым падчас перапісу 1999 года.
«Белсат» выступае за сапраўднае раўнапраўе дзяржаўных моваў. Менавіта таму мы разам з партнёрамі распачалі грамадскую кампанію «Беларускамоўны», у межах якой быў зняты гэты відэаролік.
Падрабязней пра кампанію «Беларускамоўны».
ІА, belsat.eu