Былы кандыдат на прэзідэнцтва распавёў, наколькі цяжка яму было пісаць кнігу пра «выбары пры дыктатуры».
«Беларуская Амерыканка ці выбары пры дыктатуры» – так называецца кніга кандыдата на прэзідэнцтва ў 2010 годзе Андрэя Саннікава, якая 19 лютага была прэзентаваная ў Варшаве. Прадмову да кнігі палітыка напісала Нобэлеўская лаўрэатка Святлана Алексіевіч. Сам аўтар прызнаўся, што працавалася цяжка, але вынікам палітык задаволены.
«Значная падзея, бо гэта ўсё ж такі шмат працы, шмат успамінаў было, калі працаваў. Гэта даволі цяжка было, але зараз я задаволены, таму што адразу на трох мовах зʼявілася кніжка», – кажа Андрэй Саннікаў.
У прэзентацыі ўзялі удзел асобы, якія самі прайшлі праз унутраную турму КДБ – беларускую «Амерыканку» – жонка палітыка, журналістка Ірына Халіп, рэдактарка сайту Хартыя-97 Наталля Радзіна, кіраўнік перадвыбарчага штабу Саннікава Андрэй Кобец, давераная асоба кандыдата на прэзідэнцтва ў 2010 годзе Зміцер Бандарэнка, анархіст Ігар Аліневіч.
