Моладзевы актывіст Пятро Маркелаў, пакараны 14 соднямі адміністратыўнага арышту за здымкі на выбарчым участку, 23 снежня выйшаў на волю з Цэнтру ізаляцыі правапарушальнікаў на Акрэсціна.
Сустракаць Пятра прыйшлі паплечнікі з «Моладзевага блоку», грамадскія актывісты і праваабаронцы.
«Самае горшае ў ЦІП – не фактычныя ўмовы, а стаўлене супрацоўнікаў», – сказаў Маркелаў.
Актывіст адзначыў, што збіраецца абскарджваць рашэнне суду, а таксама накіруе ў адпаведную інстанцыю скаргу на «здзекі» у ЦІП. Паводле слоў Пятра, яго «адмыслова пасадзілі ў камеру да хворых людзей».
Раней чалавек, які сядзеў разам з ім у адной камеры на Акрэсціна, паведаміў, што ў камеры Пятра на Акрэсціна была антысанітарыя і вошы.
Падчас мінулых парламенцкіх выбараў Маркелаў быў назіральнікам на ўчастку №286 99-й акругі. Пасля таго, як ён стаў здымаць на відэа патрабаванне кандыдата ў дэпутаты Стаса Шашка пералічыць пададзеныя за яго галасы, на ўчастак прыбыў нарад міліцыі. Пасля непрацяглай размовы на назіральніка надзелі кайданкі і павезлі ў аддзел міліцыі. Яго звінавацілі ў дробным хуліганстве і непадпарадкаванні міліцыі.
9 снежня актывіста асудзілі на 14 содняў, некалькі дзён запар адвакатка Альвіна Мінгазава не магла трапіць да Маркелава.
КА belsat.eu