Актор тэатральнай студыі Fortinbras, які прымаў удзел у акцыі «Дэканструкцыя міліцыянта», прызнаны вінаватым у парушэнні арганізацыі несанкцыянаванага мерапрыемства і прыцягнуты да адказнасці ў выглядзе штрафу ў 15 базавых велічынь – 367 рублёў, 50 капеек.
Актор быў затрыманы супрацоўнікамі міліцыі яшчэ ў суботу, 8 снежня. Пасля састаўлення пратакола, юнака міліцыянты змясцілі да суда ў ІЧУ. Суд меўся адбыцца 10 снежня. Аднак, суддзя Іван Касцян накіраваў справу на дапрацоўку ў РУУС. Міліцыянты даставілі актора закаваным у кайданкі. Прычым прышпіленыя былі адзін з адным ажно 15 асобаў. На пытанне да міліцыянтаў, навошта гэта робіцца, прагучаў адказ, нібыта з мэтай, каб яны не ўцяклі. Пасля ж рашэнні суддзі, разам са справай у РУУС адвезлі і затрыманага актора.
Тым часам на старонцы Беларускага свабоднага тэатру ў Фэйсбуку з’явілася інфармацыя пра затрыманне двух іншых удзельнікаў акцыі:
«Двое іншых студэнтаў Fortinbras затрыманыя да суду і знаходзяцца ў ЦІПе. Суд будзе заўтра, дакладны час невядомы», – адзначаецца ў паведамленні.
6 снежня Свабодны тэатр апублікаваў у сваім «Фэйсбуку» відэа акцыі «Дэканструкцыя міліцыянта», якая прайшла ў мінулую сераду ў Менску. Студэнты акторскай студыі ў адмысловых мундзірах з пагонамі ў колерах вясёлкавага сцягу спынялі людзей за «неадпаведны настрой», пыталі аб усмешцы, танчылі і раздавалі свісткі.
«Страшэнны вобраз міліцыянта мае патрэбу ў дэканструкцыі. Мы пераўтварылі страх у каханне. Любы можа быць ЛГБТ, а ЛГБТ часцяком маюць патрэбу ў абароне ад нашага гамафобнага грамадства. Таму мы паказалі міліцыі прыклад і самі стварылі адмысловы дэпартамент па абароне правоў ЛГБТ», – гаворыцца ў анатацыі да відэа.
СК, belsat.eu
