Ужо больш за месяц беларускія аўтамабілісты могуць купіць онлайн аўтастрахоўку АСГА. Але апытанне кіроўцаў, праведзенае AutoCare.BY, паказала, што большасць з іх не заўважыла ці не паспрабавала гэтага новаўвядзення.
Аўтааматары дагэтуль гатовыя па-старому ісці да страхавога агента, які ў парадку жывой чаргі запоўніць страхавыя бланкі, прыме аплату і выдасць квітанцыю. Пра асаблівасці онлайн-страхавання belsat.eu расказаў прадстаўнік AutoCare.BY Вадзім Кіенка.
«Па вялікім рахунку нічога для звычайных аўтамабілістаў не змянілася. У нас як было шэсць акрэдытаваных страхаўшчыкоў, так і засталося. Над гэтымі шасцю кампаніямі ёсць рэгулятар, і гэты рэгулятар – Беларускае бюро транспартнага страхавання – самастойна арганізавала на сваім сайце магчымасць заключэння страховак для шасці гэтых страхаўшчыкоў», – расказаў Вадзім Кіенка.
Як і дзе застрахавацца?
Для афармлення страхоўкі онлайн дастаткова мабільнага тэлефона з доступам у інтэрнэт. Трапіць на электронную форму страхавання можна праз сайты страхоўшчыкаў, з AutoCare.BY або па спасылцы на сайце Беларускага бюро транспартнага страхавання, дзе і апрацоўваюцца звесткі заяўніка.
Для пачатку трэба выбраць свайго страхоўшчыка. Калі вы раптам вырашыце памяняць страхавую кампанію, на выніковым кошце гэта не адаб’ецца, бо алгарытм разлікаў ва ўсіх аднолькавы.
Для онлайн-страхоўкі спатрэбяцца тэхпашпарт, агульнаграмадзянскі пашпарт і банкаўская картка (для аплаты страхавога ўнёску).
Каэфіцыенты і папраўкі для разліку выніковага кошту з улікам наяўнасці або адсутнасці ДТЗ, стажу і веку кіроўцы будуць разлічаныя і ўжытыя праграмна.
Важна!
Разам з тым прайсці страхаванне онлайн упершыню, калі вашы звесткі раней не ўносіліся ў базу АІС «Бюро», не атрымаецца. Для першаснага страхавання неабходна наведаць страхоўшчыка асабіста.
Пры падзеле гадавога плацяжу на два этапы – другую яго частку трэба будзе аплачваць ужо па-за сістэмай АІС «Бюро» – наяўнымі або безнаяўнымі сродкамі па нумары электроннай дамовы з дапамогай эквайрынгу, АРІП і іншых прыладаў. Таму «падоўжыць» аплатай другі этап дзейнай страхоўкі праз гэты інструмент не выйдзе.
Як гэта працуе пры сустрэчы з ДАІ або ДТЗ?
Пацвярджэннем заключэння электроннага дагавора стане запіс у АІС «Бюро», які можна раздрукаваць або сфатаграфаваць для сябе. Але гэта не абавязкова, бо кантралюючыя органы правераяюць сапраўднасць страхоўкі з дапамогай уласных тэхнічных сродкаў.
А калі шкода пры ДТЗ мінімальная і выклікаць ДАІ яго ўдзельнікі не збіраюцца, праверыць сапраўднасць страхоўкі можна на сайце Бюро, падставіўшы аўтамабільны нумар. Вадзім Кіенка таксама раіць кіроўцам у такіх сітуацыях упэўніцца, што яны цвярозыя і не маюць прэтэнзіяў адно да аднаго ды разумеюць, хто вінаваты ў аварыі.
МГ belsat.eu
