Заробкі выраслі. Каментуюць мінакі ды эксперты

Рэальная тэндэнцыя росту ці статыстычная памылка? Пасля двух гадоў падзення рэальных прыбыткаў беларусаў за апошнія два месяцы яны паволі пачалі расці.

«Як было ўсё, гэтак і засталося. Няма таго заробку, што абяцаюць».

«Цэны растуць, а заробкі на месцы».

«Пенсія была 320 рублёў, цяпер 340, вельмі адчуваем».

– сведчаць жыхары Магілёва.

На пачатку гэтага года рэальных прыбыткаў у беларусаў было менш на 4,5 % у параўнанні з пачаткам 2016-га года, і толькі ў верасні агульны гадавы паказнік выйшаў на плюсавы ўзровень да амаль 0,5 %. Хаця летась мы мелі рэкорднае падзенне прыбыткаў на 7 %.

Выхад з рэцэсіі ды фінансавая стабілізацыя – вонкавыя фактары

«Нафта падаражэла, таму што мы больш прадалі ўгнаенняў, таму што яшчэ расейскі рынак ёсць, які купляе», – упэўнены эканаміст Яраслаў Раманчук.

Рэальныя прыбыткі – гэта не толькі заробкі, хаця яны складаюць больш за палову, але і прыбытак ад дробнага бізнесу ды ад уласнасці, а таксама пенсіі, стыпендыі, сацыяльная дапамога.

Апошняе павышэнне пенсіяў адбылося ў лістападзе – на 5 %

Адміністратыўны метад выкарыстоўваюць не толькі ў сацыяльных выплатах.

«1000 рублёў гэта той мінімум, які мы павінныя дапамагчы людзям зарабіць», – даводзіў Лукашэнка.

Не дапамаглі. Паводле апошніх звестак за кастрычнік, сярэдні заробак па краіне складае Br 841. Але нават гэтую суму ў шмат якіх беларускіх гарадах, не кажучы пра вёскі, бачаць адзінкі. Br 300-500 – тыповая прапанова заробку ў рэгіёнах.

Усцяж няма гаворкі аб прыватызацыі стратных дзяржаўных заводаў ці хаця б аптымізацыю кіравання імі. Між тым налета ўрад чакае росту прыбыткаў беларусаў больш як на 3 %. І ў год перад магчымымі датэрміновымі прэзідэнцкімі выбарамі план будуць выконваць з падвойнаю сілаю.

Таццяна Рэут, «Белсат»

Глядзі таксама