У жыхароў менскага мікрараёну забіраюць паркоўку, збудаваную за ўласныя грошы
На сталічнай вуліцы Любімава ў людзей забіраюць прыватную паркоўку, збудаваную за ўласныя грошы і з дазволу мясцовых уладаў. Змянілася адміністрацыя раёну, прыйшоў загад дэмантаваць. У адказ жыхары зладзілі стыхійны мітынг.
Яшчэ сёння ранкам тут ляжала парковачная сетка для аўтамабіляў. Аднак невядомыя людзі прыйшлі яе здымаць. Мясцовыя жыхары выйшлі бараніць сваю ўласнасць.
Рэпартаж з вуліцы Любімава глядзіце ў поўным выданні навінаў за 30 красавіка
Жыхары дому нумар 13 на вуліцы Любімава ў Менску пакінулі працу і зладзілі стыхійны мітынг пасля таго, як работнікі без апазнавальных знакаў пачалі дэмантаваць паркоўку, якую людзі збудавалі за ўласныя грошы.
«Заплацілі і ЖЭС яе будаваў: усё зацвердзілі, ДАІ тут было падпісвала. А калі сёння пачалі здымаць пакрыццё і я выйшаў запытацца, хто вы, то адзін з чыноўнікаў адвярнуўся і сказаў, што не хоча з намі размаўляць», – кажа адзін з жыхароў дому.
Паркінг на сорак пяць месцаў жыхары 13-га дому на Любімава ў Менску збудавалі на прапанову мясцовых уладаў побач з дарогаю, каб разгрузіць двары. Кожны выдаткаваў каля $ 200, аднак прыйшлі новыя чыноўнікі і пастанавілі яе прыбраць. Кажуць, што гэта патрэбы бяспекі.
«Нібыта замінае хадзіць, нібыта стварае перашкоды для руху, нібыта стварае небяспеку для малых дзяцей», – кажуць мясцовыя жыхары.
Чатырыста подпісаў жыхароў дому, якія прасілі не вяртаць аўтамабіляў у перагружаны двор, ня сталі вартымі ўвагі раённых і гарадскіх уладаў.
«Мы будзем тут стаяць і не даваць разбураць. Звернемся ва ўправу справамі прэзідэнта. Будзем звяртацца туды, калі мясцовая адміністрацыя нічога не можа вырашыць. Калі яны наплявалі на 400 чалавек, то гэта невядома што», – заяўляюць жыхары.
Паводле мясцовых жыхароў, чыноўнікі з’ехалі з месца падзеі, калі даведаліся аб прыездзе журналістаў «Белсату». Не адказвалі на тэлефанаванні і ў адміністрацыі Маскоўскага раёну.
Галіна Абакунчык, «Белсат»
