Найвышэйшае камандаванне Узброеных Сілаў Беларусі, чальцы Памежнага камітэту, Міністэрства ўнутраных справаў, Камітэту дзяржбяспекі і нават высокія чыноўнікі з атачэння Лукашэнкі. Міжнародная выведніцкая супольнасць «Inform Napalm» абнародавала новы маніторынг «Беларусь – суверэнная дзяржава або пратэктарат Расеі?», у які трапіла 137 асобаў – магчымых агентаў расейскага ўплыву ў Беларусі.
Сярод іх – кіраўнік Генштабу Узброеных сілаў Беларусі Алег Белаконеў, які падчас брыфінгу 29 жніўня агучыў сцэнар і задуму вучэнняў «Захад-2017».
Хто яшчэ?
У спіс трапілі міністр абароны Андрэй Раўкоў і ягоныя намеснікі, найвышэйшае кіраўніцтва МУС на чале з міністрам Ігарам Шуневічам, міністр надзвычайных сітуацыяў Уладзімір Вашчанка, старшыня КДБ Валеры Вакульчык, віцэ-прэмʼеры Васіль Мацюшэўскі і Міхаіл Русы, кіраўнік ураду Андрэй Кабякоў ды іншыя.
«Калі беларускі чыноўнік, выходзячы ў адстаўку, атрымоўвае месца ў расейскім бізнесе ці нават у дзяржаўных канцэрнах, то ці не сведчыць гэта пра тое, што ён зарабіў сабе такое месца, адпрацаваў яго, выконваючы пэўныя паслугі, пакуль быў чыноўнікам у Беларусі?», – тлумачыць палітолаг Уладзімір Мацкевіч.
Як зразумець «who is who»?
Асноўным крытэрыем адбору ў спіс агентаў крамлёўскага ўплыву, паводле «Inform Napalm», стала нараджэнне чыноўнікаў і сілавікоў па-за межамі Беларусі, наяўнасць у іхнай біяграфіі фактаў службы ў савецкім КДБ, ГРУ ды іншых расейскіх ваенных падраздзяленнях, а таксама накіраванне айчынных сілавікоў у Расейскую Федэрацыю дзеля атрымання там вышэйшай адукацыі.
«Цалкам магчыма, што дзеля таго, каб гэтыя людзі былі звязаныя з расейскімі вайсковымі коламі, каб яны ўваходзілі ў расейскія афіцэрскія братэрствы і выконвалі функцыі і задачы Расейскай Федэрацыі, былі наўпроставымі агентамі ўплыву РФ у Беларусі», – кажа кіраўнік «Inform Napalm» Дзяніс Івашын.
Дыслакацыя ў Бабруйску і Баранавічах расейскай авіяцыі, выкраданне замежных грамадзянаў расейскімі спецслужбамі на тэрыторыі Беларусі, крымінальны пераслед у справе «патрыётаў» ды нарэшце – расейска-беларускія вучэнні «Захад-2017», галоўны тон якіх задае Крэмль, толькі няпоўны спіс справаў, якія зыходзяць ад агентаў расейскага ўплыву, лічаць адмыслоўцы праекту «Inform Napalm».
Цяпер, як ніколі раней, беларусам неабходная кансалідацыя, каб абараніць канстытуцыйны строй Беларусі, а нашым паўднёвым суседзям з актыўнай грамадзянскай пазіцыяй варта ўстрымацца ад паездак у Беларусь, бо з вялікай доляй верагоднасці яны могуць паўтарыць лёс украінца Паўла Грыба, выкрадзенага ў жніўні расейскім ФСБ у Гомлі.
Віталь Бабін, «Белсат», фота: Vasily Fedosenko / Reuters / Forum
