Замест развязання праблемаў унутры краіны, Лукашэнка відавочна выбраў шлях расправы над тымі, хто паказвае гэтыя праблемы.
«Калі я падышла да падʼезду, міліцыянт запытаў: куды вы ідзяце? Я назвала нумар. Ён адказаў, што туды прапусціць не можа, бо там на дадзены момант адбываецца ператрус», – распавяла журналістка «Белсату» Кацярына Ткачэнка.
У апошнюю хвіліну з машыны без нумароў яму ўдалося паведаміць калегам, куды яго вязуць.
З месца працы журналістаў на офісе па вуліцы Кастрычніцкай пасля візіту міліцыі вынеслі ўсю кампʼютарную тэхніку.
Фармальнаю прычынаю ператрусаў і канфіскацыяў стала нібыта незаконнае выкарыстанне «Белсатам» таварнага знаку. Аднак незалежныя журналісты ў такую версію адназначна не вераць.
«Гэта ўсё рабілася дзеля таго, каб паралізаваць працу тэлеканалу «Белсат». Мы ў гэтым пераканаліся. З офісу вынеслі нават маніторы. Маніторы – гэта ніякія не носьбіты, яны нікому непатрэбныя ні пры адным з вобшукаў», – тлумачыць Святлана Калінкіна, кіраўніца менскага офісу «Белсату».
«Гэта, на жаль, наступства вельмі добрай працы нашых журналістаў цягам месяца пратэстаў у Беларусі. Гэта ўзнагарода за эфектыўнасць», – зазначыла Агнешка Рамашэўская-Гузы, дырэктарка тэлеканалу «Белсат»
Маршы пратэстаў нязгодных, разгоны, арышты, несправядлівыя прысуды – за ўсім гэтым маглі назіраць гледачы дзякуючы нашым матэрыялам у інтэрнэце і на антэне. Адныя з першых пад ціск трапілі менавіта белсатаўцы. Збіццё, содні за кратамі, пагрозы і шантаж журналістаў «Белсату» аказаліся рэакцыяй уладаў на асвятленне апошніх падзеяў.
«Вы недзе набіраеце сілу, вас глядзяць, вы папулярныя. Хіба вы ідзяце правільным шляхам».
«Цяпер большую ролю гуляе не сіла, а сіла праўдзівай інфармацыі. »Белсат« дае абʼектыўную інфармацыю. Адсюль такая рэакцыя».
– упэўненыя жыхары беларускай сталіцы.
«Дзевяць кампʼютараў – гэта дзевяць кампʼютараў, вельмі добрае абсталяванне. Я спадзяюся, што ўлады іх вернуць. Але канфіскацыя не спыніць працы »Белстату«. Тут няма чаго баяцца», – патлумачыла спадарыня Агнешка Рамашэўская-Гузы.
Яна сталася прадметам судовых разбораў паміж нашым тэлеканалам і ўладальнікам фірмы «БЕЛСАТплюс» Андрэем Беляковым. Паводле яго, СМІ, якое транслюе з тэрыторыі Польшчы, парушае ягоныя бізнесовыя інтарэсы. Сёлета ён склаў чарговую скаргу.
«Улады пастанавілі гэта выкарыстаць, каб захаваць хаця б імітацыю законных дзеянняў. Паводле іх, «Белсат» фармальна можна прыцягнуць да адказнасці за выкарыстоўванне таварнага знаку іншай фірмы. Але гэта абсурд, бо мы зарэгістраваныя ў Польшчы, а тая фірма, «БЕЛСАТплюс», зарэгістраваная ў Беларусі», – кажа Аляксей Дзікавіцкі, кіраўнік рэдакцыі інфармацыі.
Да таго ж фірму Белякова зарэгістравалі ў Беларусі ўжо пасля таго, як у польскіх і беларускіх медыях шырока разышлася інфармацыя пра стварэнне нашага тэлеканалу.
«Мы звярнуліся да спецдакладчыка ААН. Мы кожны дзень рассылаем інфармацыю пра сітуацыю журналістаў у Беларусі. Пра сённяшні выпадак інфармацыя таксама пайшла», – заявіў Барыс Гарэцкі з прэс-службы БАЖ.
На сённяшнія падзеі ўжо адрэагавалі некаторыя бліжэйшыя суседзі Беларусі. Амбасадар Польшчы ў Менску заклікаў улады Беларусі неадкладна разабрацца з інцыдэнтам.
Ян Бабіцкі, «Белсат»