Цяпер у менскім хакерспейсе пуста, але яшчэ ўчора кіпела праца. Дзясяткі валанцёраў збіралі тут цэлы месяц абарончыя шчыткі для медыкаў. Такіх тут было выраблена больш за 40 тысячаў.
Адна з прычынаў спынення працы – небяспечны збор вялікай колькасці валанцёраў у адным месцы, а таксама задавальненне попыту.
«Планавалі зрабіць паўтары тысячы шчыткоў, а атрымалася вось 40 тысяч. Улічваючы агульную колькасць медыкаў, паводле нашых разлікаў, мы рэальна задаволілі практычна ўсе патрэбы медыкаў на змене, улічваючы, што шчыткі шматразовыя і перадаюцца са змены ў змену», – кажа адна з каардынатарак ініцыятывы Кацярына Бай.
Валанцёры адвезлі сродкі абароны ў 143 населеныя пункты. І нават у самыя аддаленыя куточкі краіны: Расоны, Столін, Хойнікі. Гэта рабілі добраахвотнікі за свой кошт. Такіх некалькі дзясяткаў.
«Учора вось гэта ўсё, майго барахла не было, усё гэта было загружана пад дах і ўехала ў Горадню, і там 9 бальніц я разгрузіў», – паказвае багажнік валанцёр Міхась Катляр.
«Самыя ўражвальныя былі Бешанковічы, я ніколі не забуду лекара, які плакаў, ён выйшаў за флопамі і сказаў: «Вы першыя, хто адгукнуўся нам штосьці прывезці», – узгадвае валанцёрка Кацярына Хадыка.
Арганізатары плануюць сабраць за тыдзень яшчэ заяўкі і на пачатку траўня іх выканаць. Шыццё касцюмаў працягваецца. Таксама працягваецца праца агульнанацыянальнай ініцыятывы bycovid19. Валанцёры шыюць касцюмы, маскі, закупаюць сродкі гігіены. Ініцыятыва сабрала больш за 200 тысяч долараў.
Наста Кахановіч, Белсат
