Заявіў, што незалежнасці Беларусі быць не можа, а беларуская мова і наагул – прыдуманая бальшавікамі 90 гадоў таму – аднак прычынаў для скандалу ўсё адно не бачыць. Дырэктар Расейскага інстытуту стратэгічных даследаванняў Леанід Рашэтнікаў выкліканаму ягонымі словамі скандалу здзіўляецца: падумаеш, сказаў ды сказаў!
«Гэта гістарычная частка вялікай Расеі!».
Акрамя пратэсту беларускага Міністэрства замежных справаў на словы Рашэтнікава са здзіўленнем адрэагавала і расейскае МЗС. Што б адказалі беларусафобу простыя беларусы, «Белсат» запытаўся ў людзей на вуліцах Менску.
«Такому чалавеку я прапанаваў бы да лекара звярнуцца, вось і ўсё. Гэта хвароба ўжо, шавінізм завецца».
«Хай прыязджае да нас і ўсё паглядзіць уласнымі вачыма!».
«Ніхто не павінен гэтак гаварыць. Гэта няправільна. Мы самастойная дзяржава, у нас цудоўная нацыянальная мова – і гэты чалавек папросту не мае рацыі».
«Яму трэба было б прыехаць у Беларусь, пазнаёміцца з культурай гэтай краіны і гісторыяй».
«Ён зусім не ведае гісторыі! Хай вучыць!».
«Калі я адному свайму таварышу з Масквы распавядаў гісторыю Беларусі, ён, нават не разумеючы, чым ён мяне абразіў, сказаў такую рэч: «Ну вы ж, беларусы, нашыя браты малодшыя!»
Між тым за словамі адстаўнога генерал-лейтэнанта, які кіруе ўстановай, наўпрост звязанай з расейскімі спецслужбамі ды адміністрацыяй Уладзіміра Пуціна, крамлёўскія вежы заўважныя няўзброеным вокам, адзначае дырэктар расейскіх даследаванняў Цэнтру стратэгічных і замежнапалітычных даследаванняў Юрый Царык. Фактычна, гэта меркаванне цэлай групы кіроўных элітаў РФ.
«Гэтую групу называюць па-рознаму: адныя – імперцамі, іншыя – белагвардзейцамі, хтосьці – яшчэ неяк. Але факт тое, што менавіта гэтая група, і РІСД у тым ліку, адыгралі сурʼёзную ролю ў раздзіманні канфлікту на паўднёвым усходзе Украіны».
Пра падабенства да ўкраінскага сцэнару цвердзіць і Дзяніс Івашын, які ачольвае беларускую службу ініцыятывы InformNapalm, створанай дзеля супрацьстаяння расейскай агрэсіі, найперш у інфармацыйным полі. Паводле Івашына, цяпер крамлёўская прапаганда ўзяла курс на эскалацыю і без таго абвостраных стасункаў паміж афіцыйным Менскам ды Крамлём.
«Я больш чым упэўнены, што ў наступным, 2017-м годзе мы ўсе станем сведкамі катарсісу гэтых дачыненняў, калі пытанне незалежнасці і суверэнітэту нашае краіны будзе стаяць у павестцы дня. І гэта будзе галоўнае, што мы ўсе будзем павінныя вырашаць».
Усе – то бок і простыя грамадзяне, і сілавікі, і чыноўнікі.
«Толькі дзякуючы выключна кансалідаванай пазіцыі як грамадства, гэтак і ўлады магчыма спыніць праявы гэтага «рускага міру» і запабегчы мажліваму вайсковаму супрацьстаянню з Расейскай Федэрацыяй».
Зрэшты, не варта пакідаць беларусаў сам-насам у супрацьстаянні з «русскім миром» і краінам Захаду, папярэджвае палітолаг Юрый Царык: межаў крамлёўскі шавінізм і агрэсія не ведаюць.
«Па меры нармалізацыі стасункаў паміж Беларуссю і Захадам, скарачаецца фінансаванне з боку Захаду некаторых элементаў грамадзянскай супольнасці і палітычных структур. І, канешне ж, на гэтае месца могуць прыйсці і расейскія грошы. Балазе і мяжа ў нас адкрытая, і перасоўванне гэткіх грошай не ўяўляе аніякае складанасці».
Абы не было вайны, гавораць беларусы. Каб жа яе не было, папросту адседжвацца ў хаце з краю ўжо не дастаткова.
Фота: newsbalt.ru