Маці-328 дамагліся спаткання з уладамі, сілавікамі, прадстаўнікамі адукацыі і БРСМ

Няма больш магутнай сілы, чым матулі дзяцей, якія патрабуюць абароны і дапамогі. Маці-328 змагаюцца не толькі за сваіх дзяцей, якія цяпер знаходзяцца за кратамі, але і ўсіх іншых, каб яны не трапілі ў пастку наркагандляроў. Што, на іх думку, павінныя дзеля гэтага зрабіць улады?

Пракуратура і міліцыя, упраўленне адукацыі і БРСМ – у Віцебску адбыўся круглы стол з мясцовымі ўладамі, які зыніцыявалі актывісткі Руху маці 328. Размаўлялі падчас сустрэчы, зарганізаванай упраўленнем адукацыі, пра недастатковую прафілактыку распаўсюду наркотыкаў.

Наталля Шарыпа, Рух маці 328:

«Усе распавядаюць пра шкоду наркотыкаў. Каб палепшыць гэтую прафілактыку, трэба дадаць адну фразу: што не абавязкова спажываць наркотыкі, можна ўладкавацца закладчыкам ці проста кур’ерам і трапіць за гэта на 10–15 гадоў».

Круглы стол прайшоў у закрытым рэжыме, праходзілі на сустрэчу строга паводле спісаў. Наадрэз адмовіліся прапусціць журналістаў «Белсату», не было і абяцанага арганізатарамі дзяржаўнага тэлебачання. Дый начальнік галоўнага ўпраўлення адукацыі Дзмітрый Хома на круглы стол не зʼявіўся, хоць яго і чакалі.

У вёсцы Востраў пад Пухавічамі іншым спосабам спрабуюць дамагчыся, каб улады іх пачулі. Там з адзінаццатага чэрвеня працягваецца галадоўка жанчын, якія дабіваюцца перагляду справаў супраць сваіх дзяцей паводле наркатычных артыкулаў Крымінальнага кодэксу. Ала Бярналь, галадоўніца:

«Людзі далучаюцца на дзень-два, як дазваляе праца, то бок людзі мяняюцца, а асноўныя ўтраіх мы галадаем: Алена Кузьміна, Людміла Кулініч і я».

Галадоўніца Ларыса Жыгар кажа:

«Гэтая галадоўка прысвечаная частцы 4 артыкулу 328, якую не ўключылі ні ў законапраект па змякчэнні заканадаўства, ні ў амністыю».

Частка 4 – гэта «дзеянні, учыненыя арганізаванаю групаю». Пад яе акурат і трапляюць тыя, хто хацеў падпрацаваць курʼерам у інтэрнэт-краме. Галадоўніцы звяртаюць увагу на тое, што цяперашнія спосабы барацьбы з наркотыкамі не дзейнічаюць.

«Перш за ўсё нашае патрабаванне – сустрэча з Лукашэнкам, і другое патрабаванне – перагляд крымінальных справаў па ўсіх частках артыкулу 328», – тлумачыць галадоўніца Ларыса Жыгар.

Андрэй Бандарэнка (праваабарончая арганізацыя «Платформа») лічыць, што кожны варыянт супрацы з уладамі ў гэтай сітуацыі неабходны:

«Гэта мае быць канструктыўная ўзаемавыгадная дзейнасць, таму любыя ўзаемадачыненні ў фармаце круглага стала, паседжання ў парламенце, сустрэчы – гэта ў кожным выпадку пазітыў, крок насустрач адно аднаму і разуменне той праблемы, якая на сёння існуе ў так званым наркатычным артыкуле».

Маці асуджаных паводле наркатычных артыкулаў спадзяваліся на амністыю для сваіх дзяцей, але кіраўнік краіны сказаў, што змякчэння прысудаў для іх не будзе.

Ірына Дарафейчук, belsat.eu

Глядзі таксама