Толькі 5 дзён пратрымаліся ранейшыя кошты на паліва. Сёння адбылося чарговае падаражэнне. На 1 капейку, але гэта ўжо шостае падвышэнне цэнаў ад пачатку года, што не засталося незаўважаным аўтааматарамі.
Гэтак бензін на айчынных запраўках прадаецца танней за яго сабекошт. Як гэта магчыма? Нафтаперапрацоўчыя заводы кампенсавалі страты за кошт продажу паліва за мяжу, але апошнія месяцы і гэта перастала пакрываць страты. Для НПЗ застаўся адзіны шлях.
«Падвышаць кошты пакуль яны не выраўняюцца з расейскімі, пакуль гэта не стане прыбытковым для Белнафтахіму», – даводзіць Аляксей Хвашчынскі, галоўны рэдактар газеты «ABW.BY».
У Расеі на змену перадвыбарчай «стабільнасці», паводле экспертаў, мае прыйсці рэзкае вялікае падаражэнне паліва.
Чакаецца, што ў так званы перыяд сезоннага росту попыту на паліва, цэннікі на запраўках у Расеі пачнуць заўважна змяняцца, а значыць, і ў нас таксама.
«Калі мы хочам даведацца, якія кошты будуць у Беларусі летам ці бліжэй да восені, будзем глядзець на кошты на Смаленшчыне, на Браншчыне і Пскоўшчыне. І гэта значыць, што калі ў Расеі кошты падрастуць, то ў нас яны праз тыдзень-два, праз месяц вырастуць», – упэўнены спадар Хвашчынскі.
У Расеі чакаецца павышэнне на адразу 5 расейскіх рублёў за літр – гэта 17 беларускіх капеек. Але такое аднаразовае падаражэнне ў Беларусі наўрад ці будзе.
«Беларускі ўрад выкарыстоўвае методыку «жаба і кіпень». Калі нельга жабу зварыць у кіпені, трэба павялічваць тэмпературу на 1 градус і рабіць гэта кожныя 2-3 дні. Калі б улады паднялі кошт у эквіваленце да 1 долара, то быў бы бунт», – тлумачыць эканаміст Яраслаў Раманчук.
«Форма, якую выбралі ўлады, як я казаў з той жабай, людзі не адчуваюць, ніхто не будзе пратэставаць праз 1 капейку, а калі напрыканцы года атрымаецца ў суме 25 %, то людзі пабурчаць-пабурчаць ды скажуць, а можа, так і трэба», – дадае эканаміст.
Да канца года гэткімі тэмпамі кошты на паліва ўзнімуцца на чвэрць, калі не напалову. А гэта значыць, што павысяцца кошты і на харчы ды тавары. У сувязі з чым застаецца чакаць прынамсі такога ж росту заробкаў.
Вольга Старасціна, «Белсат», фота: Vasily Fedosenko / Retuters / Forum