Фермер кажа, што вырашыў перасесці з трактару ў дэпутацкае крэсла праз несправядлівасць дзяржавы.
Такога кандыдата яшчэ не было: Юрый Ганцэвіч вылучаецца на выбары ў Палату прадстаўнікоў па гомельскай Чыгуначнай акрузе – і прыязджае на пікет трактарам.
«Кіраўнік дзяржавы паўсюль кажа і выступае па ТБ: развівайце сельскую гаспадарку, развівайце аграсядзібы. Выдае для гэтага ўказы, але яны не працуюць. То бок яны гэтымі ўказамі дураць галаву нам», – заяўляе Ганцэвіч.
Сярод прапановаў патэнцыйнага кандыдата – упарадкаванне заканадаўства, якое дало б палёгку малому бізнесу, у першую чаргу – тым, хто працуе на зямлі.
«Купі карову – няма дзе яе пасвіць. Забралі ўсе землі і перадалі калгасам», – кажа фермер.
Юрый Ганцэвіч з вёскі Пакалюбічы стаў вядомы пасля таго, як у сеціве з’явіўся ролік: на відэа фермер эмацыйна распавядае працаўніку ДАІ, што на ім зарэгістравана ажно дзевяць транспартавых сродкаў, і за кожны – трэба плаціць вялізны дарожны збор.
Глядзіце рэпартаж Віталя Бабіна ў поўным выданні навінаў за 22 верасня
На канале фермера гэты ролік праглядзелі больш за 250 тысяч чалавек. Большасць каментатараў падтрымала Юрыя, нязгоднага з гэткаю сістэмай аплаты дарожнага збору. Некаторыя прыйшлі падтрымаць фермера і сёння, ужо не віртуальна.
Вось што сказалі ў каментары «Белсату» жыхары Гомля:
«З роліку дазналіся пра ягоную пазіцыю. Грамадзянскую. Правільную, як мне падаецца».
«Чалавек працуе, добрасумленна. Значыць, трэба за яго галасаваць, падтрымліваць яго».
«Калі кандыдат незалежны, на ўладу не арыентуецца, то чаму б не?»
«Выбары ўжо даўно прайшлі ў Адміністрацыі прэзідэнта. Засталося галасаванне нікому не патрэбнае».
Мнагалюдна было і на перадвыбарчых пікетах у Берасці: падпісацца за прэтэндэнтаў на кандыдацтва, якія пратэстуюць супраць акумулятарнага заводу, збіраліся чэргі. Праўладныя пікеты такою ўвагаю выбарнікаў не карысталіся.
Віталь Бабін, «Белсат»
