У Фаніпальскіх школах дзеці з нецярпеннем чакаюць заняткаў па беларускай мове і літаратуры, рыхтуюцца, цягнуць рукі. І ўсё дзякуючы мясцоваму бізнесоўцу, які запусціў адмысловую акцыю для школьнікаў.
– Дадзіце?
– Так.
– Ееееее!!!!Ура!!!Ура!!! Ура!!!
Сафія Дуванава, вучаніца 1-й школы, Фаніпаль:
«Я першы раз атрымліваю бульбу-фры бясплатна!!!»
У Фаніпалі кавярня «Бульба Драйв», якая адкрылася побач з першай школай, ладзіць акцыю. Калі звычайны кошт бульбы – два з паловаю рублі, то за адзнакі па прадметах ад 8 ды вышэй кошт зніжаецца да паўтара рубля. А вось за дзявяткі і дзясяткі за прадметы на роднай мове – бульба ў падарунак.
Да касы не прабіцца, вялікая чарга, усе хочуць атрымаць бясплатную порцыю бульбы.
– Мы спецыяльна засталіся пасля ўрокаў, каб расказаць верш.
– А чаму не размаўляеце па-беларуску?
– Не ведаем.
Для атрымання пачастунку неабходна паказаць дзённік з адзнакай за гэты ж дзень. Вучні распавядаюць, што цяпер самі сталі прасіць настаўнікаў задаваць ім вершы на памяць.
– Як па-беларуску будзе «очки»?
– Акуляры.
– Ну, правільна. Так, беларуская мова, бачу. Ёсць бульба.
Вучні кажуць, што цяпер у школе вялікая канкурэнцыя: рыхтуюцца ўсе. Але знаходзяцца і тыя, хто дамалёўвае сабе адзнакі або ідзе паўторна з чужым дзённікам:
«За 9, 10 па беларускай мове і літаратуры даюць бясплатную бульбу-фры. З-за гэтага нашыя дзеці сталі старанна старацца, адказваць, працаваць каля дошкі».
«Раней у нас настаўніца ставіла 6, 7 па беларускай мове, а зараз стала ставіць лепш, бо бачна, што ўсе сталі старацца».
– Беларуская – ёсць. Станавіся сюды. Яшчэ 10-ка. (Смяецца) Жах нейкі! Настаўніцу мне запрасіце, скажыце ў «Бульба Драйв» яе клікалі, я з ёй паразмаўляю. 10-ка. Вы што? Згаварыліся?
Акцыя будзе дзеяць да канца навучальнага года.
Вольга Чайчыц, belsat.eu