Грамадзянская вайна Башара Асада ў Сірыі гэта амаль тое самае, што і Вялікая Айчынная. Так распачаў інтэрвʼю з сірыйскім дыктатарам працаўнік дзяржаўнага тэлеканалу ОНТ.
Праграма выйшла ў эфір напярэдадні ўвечары.
Башар Асад у аналогіях з Вялікай Айчыннай пайшоў далей: у Сірыі няма міжканфесійнай розні, сірыйскі народ абараняе дзяржаву, а хто супраць – тэрарысты. А тэрарыстаў дасылае Захад, каб насадзіць сваю – цытата -«псеўдасвабоду і ілжывую дэмакратыю».
«Тэрор – толькі інструмент для некаторых заходніх краінаў. Яны хочуць усталяваць такое ж сусветнае панаванне, як і нацысты ў свой час», – цвердзіць прэзідэнт Сірыі.
Параўнаць краіны Захаду і гітлераўскую Нямеччыну – гэта занадта нават для беларускага дзяржаўнага тэлебачання, дый у прынцыпе можа адбіцца на замежнапалітычных адносінах, даюць ацэнку адмыслоўцы.
«Гэта чыстай вады прапаганда і спроба маніпуляваць, найперш для ўнутрыбеларускай аўдыторыі, каб паказаць, што любая барацьба з дзейсным рэжымам і ўладай ляжыць дзесьці між тэрарызмам і нацызмам», – упэўнены Андрэй Паротнікаў, кіраўнік «Belarus Security Blog»
Башар Асад – не самы папулярны ў беларусаў палітык
З жыхароў Менску, апытаных Белсатам, інтэрвʼю сірыйскага прэзідэнта не глядзеў амаль ніхто..
«Рухацца трэба за тымі краінамі, якія дасягнулі лепшага для жыцця сваіх людзей. У гэтым сэнсе Башар Асад не ўзор».
«Рэжымы падобныя, яны хіба добра разумеюць адно аднога».
«Яго іншыя лідары нармальных краінаў не прымаюць, таму яму нічога не застаецца, як сябраваць з Асадам і іншымі».
– кажуць жыхары беларускай сталіцы.
За што Асад удзячны Лукашэнку?
Кіраўнік Беларусі не толькі дасылае ў Дамаск самалёты з гуманітарнай дапамогай, але і абараняў інтарэсы Башара Асада з трыбуны Генеральнай Асамблеі ААН, патрабуючы не ўмешвацца ва ўнутраныя справы іншых дзяржаваў. За гэта Башар Асад таксама дзякаваў Лукашэнку на канале ОНТ.
Асад не прызнае, што ўжываў хімічную зброю
Міжнародныя праваабарончыя арганізацыі абвінавачваюць сірыйскага прэзідэнта ў шматлікіх ваенных злачынствах: расстрэлах дэманстрацыяў апазіцыі, катаваннях і забойствах палонных, у блакаванні гарадоў ад паставак медыкаментаў, ежы і вады, у бамбаваннях шпіталяў і мірнага насельніцтва. Апошні найбольш вядомы эпізод: хімічная атака на горад Хан Шэйхун з авіябазы Шайрат.
«Гэта кампанія, мэта якой была ў дэманізацыі сірыйскай дзяржавы ў вачах простага народа. І на нейкі час частка сірыйскага народа ў гэта паверыла. Але потым давялося выбіраць іншую тактыку – дэманізаваць сірыйскую дзяржаву ў вачах заходняга грамадскага меркавання, каб атрымаць падтрымку на ваеннае ўварванне», – даводзіць Аль-Асад.
Затое Беларусь разам з Расеяй – асноўны гулец на міжнароднай арэне ў абароне Сірыі, заявіў у інтэрвʼю Башар Асад.
«Сірыя, як дзяржава, спыніла сваё існаванне, на дадзены момант яна не існуе, і таму ніякай цікавасці, акрамя прапагандысцкай, акрамя лаяльнасці Крамлю, для беларускіх уладаў Дамаск не ўяўляе», – упэўнены спадар Паротнікаў.
А з эканамічнага гледзішча Менску больш цікавая супраца з Турцыяй, Катарам і Саудаўскай Аравіяй – краінамі, якія Башар Асад абвінавачваў у падтрымцы тэрарыстаў так званай «Ісламскай дзяржавы». Таму Лукашэнка лятае не ў Дамаск, а ў Доху.
Яраслаў Сцешык, «Белсат»
