На абеліску ў гонар Джорджа Вашынгтона – праекцыя ракеты «Сатурн 5» у натуральную велічыню.Такая ракета некалі даставіла астранаўтаў на Месяц. Амерыка адзначае 50-годдзе высадкі на спадарожнік Зямлі. «Адзін малы крок для чалавека, адзін гіганцкі скачок для чалавецтва» – першы крок Ніла Армстранга на Месяцы людзі змаглі ўбачыць у жывым тэлеэфіры.
Высадка на Месяцы – не проста адна з перамог ЗША ў вайсковым спаборніцтве з СССР. Яна дазволіла чалавецтву зазірнуць у мінулае Сонечнай сістэмы. Дапамаглі ў гэтым 382 кілаграмы грунту і скалаў, якія прывезлі з Месяца шэсць касмічных экспедыцыяў.
«Мы можам прасачыць, што адбываецца з вулканамі цяпер, але вельмі цяжка прадказаць будучыню, таму што ў нас недастаткова звестак пра мінулае. І гэтыя скалы з Месяцу даюць нам інфармацыю, якая дазваляе прымаць важныя рашэнні», – кажа Мэт Пэнкгэрст, вулканолаг.
Вогнетрывалыя камбінезоны пажарных, бесправадныя дрылі і нават падэшвы абутку з паветранымі падушкамі – гэтымі рэчамі мы абавязаныя праграме «Апалон».
Палёт на Месяц падштурхнуў развіццё камп‘ютараў, сувязі і лёгкіх сплаваў.
Палёт на Месяц падштурхнуў развіццё камп‘ютараў, сувязі і лёгкіх сплаваў.
«Калі вы працуеце над нечым падобным, у вас няма часу думаць, наколькі гэта вялікая справа. У вас зашмат працы, і занадта шмат людзей залежаць ад таго, што вы робіце», – кажа Сам’юэл Капэл, інжынер кампаніі «GRUMMAN».
300 тысячаў чалавек, паводле падлікаў NASA, працавалі над тым, каб адправіць чалавека на Месяц. Свой уклад зрабіў і беларус Барыс Кіт, які летась памёр на 108-м годзе жыцця. Сярод іншых ён распрацоўваў паліва для ракетаў «Сатурн».
«Падыходзіць да мяне мой начальнік і кажа: «Слухайце, даражэнькі, нам патрэбнае мацнейшае паліва. І ў нас ёсць думка пра вадарод. Дайце нам усё!» Гэта былі першыя даследаванні на вадародзе», – распавядаў Барыс Кіт, фізік, матэматык.
З трох удзельнікаў першай касмічнай экспедыцыі ў жывых сёння засталіся двое – Майкл Колінз і Баз Олдрын. Ніла Áрмстранґа не стала ў 2012 годзе. Пілатаваныя караблі так і не змаглі паляцець далей за «Апалоны», скардзіцца ягоны таварыш.
«Ужо 50 гадоў няма ніякага прагрэсу. Я думаю, нам усім павінна быць крыху сорамна, што мы не зрабілі нічога лепшага», – лічыць Баз Олдрын, удзельнік першага палёту на Месяц.
Зробім – заяўляе прэзідэнт ЗША. Ён паставіў перад NASA задачу адправіць чалавека на Месяц да 2024 года.
«Мы ідзем значна далей! Мы ляцім не толькі на Месяц, але і на Марс! Космас важны з пункту гледжання бяспекі. Мы ствараем касмічныя сілы», – сказаў Доналд Трамп, прэзідэнт ЗША.
На год раней за NASA высадзіць астранаўтаў на Месяц ужо паабяцаў бізнесмен І́лан Маск. Амерыканцы – не адзіныя, хто ўключыўся ў гонку. У 2031 годзе высадзіцца на Месяцы плануюць расейцы. Аднак іх можа апярэдзіць Пекін. Кітайцы паабяцалі ступіць на спадарожнік Зямлі цягам 10 гадоў.
Аляксандр Папко belsat.eu
