«Ня бойцеся!» – гэтымі словамі ў Рыме звярнуўся да вернікаў сорак гадоў таму новаабраны Папа. І гэтымі словамі пачалася цэлая эпоха Яна Паўла Другога.
Кракаўскі мітрапаліт, кардынал Караль Юзэф Вайтыла, папа Ян Павал Другі маральным аўтарытэтам быў не толькі для каталікоў. Менавіта ягонае імя звязваюць з міратворчаю дзейнасцю Касцёлу і яго пакаяннем, а таксама з падзеннем камуністычнай дыктатуры ў краінах Усходняй Еўропы.
Валерый Карбалевіч, палітолаг:
«Найперш гэта стварэнне прафсаюзу «Салідарнасць» у Польшчы і ягоны візіт у Польшчу ў гэтыя часы аказаў вельмі моцны ўплыў на польскае грамадства і каталіцкая царква даволі моцна садзейнічала апазіцыйнаму руху ў Польшчы».
Цягам свайго амаль 27-гадовага кіравання Ян Павал Другі здзейсніў больш за сто пілігрымак у розныя краіны свету.
Менавіта тут, на плошчы Пілсудскага ў Варшаве, Папа Ян Павал Другі сустракаўся з польскімі вернікамі праз год пасля абрання, падчас першага ў гісторыі візіту Папы Рымскага ў краіну камуністычнага лагеру.
А вось да Беларусі пантыфік даехаць не здолеў. Сустрэчы Папы Рымскага з беларускімі вернікамі не жадала Расейская праваслаўная царква. Але менавіта Ян Павал Другі стварыў у нашай краіне паўнавартасную каталіцкую структуру, прызначыў першага ў незалежнай Беларусі каталіцкага біскупа, а пазней – кардынала, павялічыў колькасць дыяцэзіяў.
Юрый Барок, каталіцкі святар:
«Калі беларусы ўпершыню паехалі на аўдыенцыю да Рымскага Папы, то Ян Павал Другі сказаў знаменныя словы, актуальныя да сёння: свабода не даецца, свабода здабываецца».
Ян Павал Другі – першы Папа, які звярнуўся да беларусаў па-беларуску. А вось што памятаюць пра яго менчукі:
«Святы, на сёння, гэта заступнік за нас перад Богам».
«Для мяне настаўнік па жыцці, я чытала многа з таго, што ён пісаў».
«Вялікі ўнёсак у развіццё каталіцызму ў свеце, у прымірэнчыя аспекты паміж праваслаўем і каталіцызмам».
Папа Ян Павал Другі заклікаў вярнуцца да хрысціянства ды шанаваць жыццё, нагадваў аб правах і годнасці чалавека. А ягоны заклік «Не бойцеся!» актуальны будзе яшчэ доўга.
Ірына Дарафейчук, belsat.eu
Фота: Bogdan Krezel / Przekroj / FORUM
