Затрыманне дачкі Кастусёва, дзень народзінаў за кратамі і пераезд «Валадаркі». Рэпрэсіі 24 красавіка
У Беларусі амаль тысячу асобаў затрымалі з палітычных прычынаў за першыя тры месяцы года. «Сітуацыя з парушэннем правоў чалавека ў краіне застаецца катастрафічнай», – канстатуе цэнтр «Вясна». «Белсат» працягвае фіксаваць факты рэпрэсіяў, што не сціхаюць з 2020 года.
Сілавікі затрымалі дачку палітзняволенага Рыгора Кастусёва Кацярыну. Яе прымусілі сказаць на камеру, што ў 2020 годзе яна аказвала садзейнічанне «Вясне» і што нібыта зарэгістравалася ў чат-боце плану «Перамога».
Старшыню партыі БНФ ужо больш як тры гады трымаюць у няволі. За кратамі ў яго пагоршыўся стан здароўя, выявілася анкалагічная хвароба.
10 узброеных сілавікоў прыйшлі затрымліваць жыхара Жабінкаўскага раёну за каментары. Міліцыянты бегалі каля дому мужчыны, пагражалі выламаць дзверы, наводзілі зброю на вокны – такое відэа апублікавалі праўладныя крыніцы. Затрыманага абвінавацілі ў «распальванні варожасці» у дачыненні сілавікоў і «закліках да гвалтоўных акцыяў».
Суддзя суда Савецкага раёну Менску Вольга Емельянчанка прызначыла 2,5 года «хатняй хіміі» мужчыне за ўдзел у масавай акцыі 2020 года. Мікіту Дабравольскага абвінавачвалі паводле «народнага» артыкула аб групавых дзеяннях, што груба парушаюць грамадскі парадак. Доказамі ў справе былі фота з ягонага тэлефона і паліто бэжавага колеру, у якое ён тады быў апрануты.
На 1000 рублёў аштрафавалі былую палітзняволеную Таццяну Пыцько – жонку віцебскага журналіста Вячаслава Лазарава. Нагодаю стаўся «экстрэмісцкі» лагатып на старонцы жанчыны ў сацсетцы «Одноклассники». У верасні летась Пыцько далі 3 гады калоніі, аднак Вярхоўны суд адтэрмінаваў пакаранне на 3 гады.
Хрысціянскі прапаведнік Сергій Мельянец, які ўцёк з Беларусі разам с жонкаю і семярымі дзецьмі, распавёў пра сваё затрыманне, збіццё ў Фрунзенскім РУУСе, жорсткія ўмовы на Акрэсціна, пагрозы крымінальнай справай за «здраду дзяржаве» і пра тое, як яму ўдалося пазбегнуць далейшага пераследу. Мельянца затрымалі 19 сакавіка ў Менгарсудзе, куды ён прыйшоў падтрымаць палітзняволенага журналіста-каталіка Ігара Карнея. Прапаведнік прабыў на Акрэсціна 25 сутак.
Кватэру палітзняволенага праваабаронцы Уладзіміра Лабковіча прадалі на аўкцыёне за 145 390 рублёў. На нерухомасць на вуліцы Тухачэўскага ў Менску прэтэндавалі трое. Юрыст «Вясны» Павел Сапелка назваў продаж кватэры Лабковіча – пакараннем калегі за праваабарончую дзейнасць.
Палітзняволеная Марыя Калеснікава сустрэла за кратамі чарговы дзень народзінаў. Сёння ёй споўнілася 42 гады. Кіраўніца выбарчага штабу Віктара Бабарыкі ў няволі ўжо больш за 3 гады і 7 месяцаў. Ужо 14 месяцаў родныя не атрымліваюць ад яе лістоў. Калеснікаву трымаюць у гомельскай жаночай калоніі.
Тым часам ініцыятыва dissidentby паведаміла пра расфармаванне СІЗА №1 на Валадарскага ў Менску. Там перасталі прымаць перадачы. Вязняў перавязуць у Магілёў і Жодзіна, а таксама ў Калядзічы, дзе пабудавалі новы следчы ізалятар. Паводле звестак dissidentby, у СІЗА на Валадарскага знаходзяцца найменей як 42 палітвязня.
Сцяпан Кубік belsat.eu
